COMO AXUDAR AOS NOSOS FILLOS E FILLAS PARA QUE DURMAN NA SÚA CAMA E COMO DURMIR BEN

 

Un dos momentos máis difíciles do día é a hora de deitar aos nosos fillos e fillas. É normal que se resistan a durmir por múltiples razóns, xa que desexan estar máis tempo cos seus pais, cos seus irmáns, vendo a tele, ou charlando e contando historias. Pero, como os podemos axudar para durmir ben e na súa cama?

 Imos facelos e facelas partícipes da súa propia rutina do soño para durmir ben, sós e á mesma hora.

1. Establecer unha rutina diaria de soño que inclúa un período de tranquilidade antes da hora de durmir: luz suave, música relaxada, ler un conto, falar en voz baixa...
2. Evitar ou reducir ao mínimo o acceso á televisión ou aos videoxogos antes de durmir. A sobreexcitación luminosa ao longo do día, o exceso de horas expostos á luz azul en horas próximas ao soño, e a proximidade á que temos os principais dispositivos de altas emisións, provocan que se inhiba parcialmente a produción de melatonina. A luz azul activa no noso cerebro o sinal de que estamos no medio do día, polo que aparece o insomnio, tardamos en coller o soño, desvelámonos e este pasa a ser de peor calidade.
3. Comezar de maneira paulatina nun momento de relax e calma. Ao principio pode que esteamos moito tempo para que consiga conciliar o sono e necesite a nosa presenza continuada aportándolle seguridade e confianza ante os seus medos. Pouco a pouco entenderá que é un proceso máis e se irán adaptando. Paciencia, comprensión, empatía e cariño.
4. Flexibilidade sen perder de vista o noso obxectivo: que durma na súa cama. Podemos acompañalo neste proceso estando con el ou ela, dándolle tempo, entendendo os seus medos, respectando as súas necesidades. Acompañámolo neste proceso quedándonos a durmir con el ou ela ata que o precise.
5. Celebrar cada éxito, reforzando logros por pequenos que sexan (durmir un ratiño na súa cama...) en lugar de remarcar o aínda non conseguido. 
6. Amosar dispoñibilidade, calma e seguridade: imos as veces que precise a despedirnos, comprendamos os seus medos e enfados... Todo cambio leva o seu tempo e precisa positividade, calma, seguridade, comprensión e confianza.
7. Establecer un horario para durmir todos os días, que axudará ao neno ou nena para manter unha rutina. Os rituais para durmir son maneiras efectivas para empezar a formar os bos hábitos.
8. Durmir cun peluche ou xoguete de apego. Permitirlle, se así o desexa, que leve un xoguete, un  osiño, ou a súa manta favorita á cama.
9. Controlar que a temperatura na habitación sexa agradable e que a roupa sexa cómoda.
10. Deixar unha luz acesa, a porta  entreaberta ou un vaso de auga á beira da cama, se o pide.
11. Non acudir cada vez que chama ou se queixa. Se é así, estaraslle a afacer a chamar sen necesidade. Debes estar atento sempre e acudir só cando exista algún signo de problemas reais como os pesadelos, o  somnambulismo, etc.
12.  Alimentos que axudan a conciliar o sono:
• Froitos secos: As améndoas e as noces son alimentos ricos en melatonina, polo que poden favorecer un bo descanso nocturno.
• Leite: Os produtos lácteos poden axudar a durmir polo seu alto contido en triptófano. Ademais, tomar un vaso de leite quente antes de deitarse é un hábito relaxante que facilita o descanso. 
• Aves: A carne de pavo e a de pito tamén son fontes excelentes ricas en triptófano. 
• Froitas: Os plátanos poden axudar a durmir porque son ricos en triptófano, melatonina e magnesio. Outra froita recomendable é o kiwi, polo seu contido en serotonina. 
• Cereais: Os cereais poden facilitar o soño. Por unha banda, son unha fonte excelente de hidratos de carbono, que axudan a aumentar a cantidade de triptófano dispoñible para converterse en serotonina (triptófano obtido a partir doutros alimentos). E, por outra banda, algúns cereais como a avea, o arroz e o millo son fontes naturais de melatonina. Con todo, é preferible o consumo de cereais integrais, xa que conteñen máis fibra e vitaminas que as formas refinadas. 
• Peixe azul: O atún e o salmón teñen un alto contido de ácidos graxos omega 3 e vitamina D. A combinación de ambos nutrientes pode axudar a durmir mellor, xa que parecen ter un papel importante na regulación da concentración de serotonina. Infusións.

Estes consellos poden servir de axuda para durmir, pero debemos estar moi seguros e convencidos das medidas que imos establecer. Os nosos fillos e fillas necesitan sentirse seguros e moi especialmente á hora de durmir. As rutinas ou rituais para ir á cama son fundamentais para establecer unha pauta de soño nos nenos e nenas.